តើធ្វើយ៉ាងណាដើម្បីសិក្សាគណិតវិទ្យាឲ្យចេះ?

នៅក្នុងអំឡុងពេល២ឆ្នាំដែលខ្ញុំបានវិលត្រឡប់មកបង្រៀននៅប្រទេសកម្ពុជាវិញ ខ្ញុំបានជួបប្រទះ​សំណួរជា​ច្រើនជុំវិញ​វិស័យអប់រំគណិតវិទ្យាដែលទាក់ទងទៅនឹងវិធីសាស្រ្តបង្រៀន​ក៏ដូចជាកម្មវិធីសិក្សា​ដែលបានចោទ​សួរ​ដោយ​សិស្សឬមាតាបិតាសិស្ស។ ប៉ុន្តែសំណួរដែលខ្ញុំជួបច្រើនជាងគេពីសិស្សនោះគឺ “តើខ្ញុំត្រូវធ្វើ​យ៉ាងម៉េច​ដើម្បី​សិក្សា​គណិត​វិទ្យាឲ្យចេះ?”​

មុននឹងខ្ញុំឆ្លើយសំណួរនេះ ខ្ញុំចង់និយាយអំពីជំនឿដ៏គ្រោះថ្នាក់​មួយដែល​សិស្សនិងឪពុក​ម្តាយភាគច្រើនគិតថា​វាជា​ការពិត។ ខ្ញុំបានជួបប្រទះមនុស្សជាច្រើននាក់ដែលគិតថា ពួកគាត់គ្រាន់តែសិក្សា​គណិតវិទ្យាមួយ​ខែ​ឬ​ពីរ​ខែ ក៏នឹងអាចមានសមត្ថភា​ពស្​មើនឹ​ងគេ​ដែ​លសិក្សារាប់ឆ្នាំ។  ខ្ញុំស្ទើរតែគ្មានពាក្យ​និយាយតបទៅគាត់​នៅពេល​ដែល​​សិស្ស​សួរថា លោកគ្រូខ្ញុំត្រូវការរៀនគណិតដើម្បីត្រៀមប្រឡងយកអាហារូបករណ៍ ឬប្រឡង​ចូលសាលា​ពេទ្យក្នុងរយះពេល៥សប្តារហ៍ទៀត ប៉ុន្តែខ្ញុំអត់ចេះអ្វីសោះ។ ខ្ញុំគ្មានចម្លើយ​ណាដែល​អាចឆ្លើយ​ទៅគាត់​ដែល​មិន​​ធ្វើឲ្យ​គាត់អស់សង្ឃឹមនោះទេ។

គណិតវិទ្យាមិនមែនជាមុខវិជ្ជាដែលយើងអាចសិក្សាតែពីរបីអាទិត្យបានទេ។ នេះជាជំនឿដ៏​គ្រោះថ្នាក់​បំផុត​សម្រាប់​​សិស្ស​និងលោកអ្នកជាឪពុកម្តាយក្នុងការរៀបចំអនាគតកូនៗ។ តាមពិតទៅ វាមិនខុសពីការ​សង់ផ្ទះ​ឬអាគារ​ធំៗ​ឡើយ។ បើសិនជាយើងចង់ឲ្យវាម៉ាំ យើងត្រូវតែ​ចំណាយ​ពេលបុក​គ្រិះឲ្យ​បានជ្រៅ​ទើបយើងអាច​សង់ទៅលើ​បាន​ខ្ពស់ហើយ​ជាប់ល្អ។ គ្រិះនៃគណិតវិទ្យាមានសារៈ​សំខាន់ក្រៃលែង​ក្នុងការសាង​សង់ចំណេះ​ដឹង​ឲ្យបាន​ខ្ពស់​និងទូលំទូលាយ។ គ្មាននរណាអាចសង់អាគារខ្ពស់ដោយគ្មានគ្រិះនោះទេ ដូចគ្នាដែរ គ្មាន​សិស្ស​​​ណា​អាចសិក្សាគណិតប្រសិនបើគាត់មិនទាន់មានគ្រិះពីក្រោមមកទេ។ ដូច្នេះ​ចម្លើយ​ដែល​ខ្ញុំតែងតែ​ប្រាប់​សិស្ស​នៅ​ពេលដែលពួកគាត់សួរខ្ញុំថា តើពេលណាជាពេលល្អបំផុតសម្រាប់ត្រៀម? ២ឆ្នាំមុន!

អ្វីមួយទៀតដែលខ្ញុំធ្លាប់បានសង្កេតឃើញគឺសិស្សភាគច្រើនមានទម្លាប់សិក្សាមួយឆ្នាំមុន ដើម្បី​ត្រៀម​សម្រាប់​ឆ្នាំ​ក្រោយៗ។ ទោះបីជាមានសិស្សខ្លះអាចសិក្សារំលង់ថ្នាក់បាន ក៏មិន​បានន័យ​ថាវា​ជាវិធី​ល្អមួយ​ក្នុងការ​សិក្សា​គណិត​វិទ្យា​ដែរ។ បើសិនជាយើងមិនទាន់សង់ជាន់ទី១ឲ្យបានម៉ាំទេ យើងម៉េចនឹង​អាចសង់​ជាន់បន្ត​ទៅលើ​ទៀត​បាន? ការសិក្សា​របៀបនេះ​បានធ្វើ​ឲ្យសិស្សមួយចំនួនជឿថា​គណិតវិទ្យាជាមុខវិទ្យាដែល​អាចសិក្សាទៅ​តាម​​​តែ​ការគិតរបស់គេ។ គណិតវិទ្យាជាមុខវិទ្យាដែលមានមាតិការច្បាស់លាស់និងភាពទូលំទូលាយ អាច​សិក្សា​​​មិនចេះចប់ មិនចេះហើយ។ សូម្បីតែ​ថ្នាក់ទី១០ មួយយើងអាច​ចំណាយពេល២ឆ្នាំ​ក៏មិនប្រាកដថា​អាច​​សិក្សា​ឲ្យស៊ីជម្រៅដែរ ប្រសិនបើយើងសិក្សាវា​ឲ្យទូលំទូលាយនោះ។

ជំនឿនៃការសិក្សាគណិតវិទ្យាអស់ទាំងនេះត្រូវតែផ្លាស់ប្តូរឲ្យបានឆាប់បំផុតប្រសិនបើយើងចង់ឲ្យសិស្សជំនាន់​ក្រោយ​ទទួលយកបាននូវការចេះដឹងពិតប្រាកដមួយ មិនមែន​គ្រាន់តែសម្រាប់ត្រៀម​ប្រឡងឬរំលង​ថ្នាក់នោះ​ទេ។ ការរៀនសង្ខេបបែបនេះជាមូលហេតុដែលសិស្សភាគច្រើនមិនយល់ពិត​ប្រាកដ​ថាគណិត​វិទ្យាមាន​សារៈ​សំខាន់​អ្វីខ្លះហើយហេតុអ្វីបានជាយើងត្រូវសិក្សាអំពីវា។ សិស្សភាគច្រើនតែងតែរអ៊ូថា តើអនាគតទៅ ខ្ញុំយកវា​ទៅធ្វើ​អី? ខ្ញុំគិតថា​ប្រសិនបើសិស្សមិនអាចឆ្លើយសំណួរនេះបាន ​គឺគាត់មិនយល់ពីគណិតវិទ្យាពិតប្រាកដទេ ទោះ​បីជាពួកគាត់​ចេះគណិតប៉ុណ្ណាក៏ដោយ។

ដូច្នេះចម្លើយសម្រាប់សំណួរដែលសួរថា តើខ្ញុំត្រូវធ្វើយ៉ាងម៉េចដើម្បីសិក្សាគណិតវិទ្យាឲ្យចេះពិតប្រាកដគឺ៖

1.  ត្រូវហ៊ានទទួលស្គាល់ថាខ្លួនយើងមិនចេះ -- យើងមិនត្រូវខ្លាចនឹងទទួលស្គាល់​ថាខ្លួន​យើង​មិន​ចេះ​ទេ។ នេះជាជំហ៊ានដំបូងក្នុងការកសាងគ្រិះនៃគណិតវិទ្យាឡើងវិញ។ ប្រសិន​បើយើងគិត​ថាអាង​ទឹកយើង​​ពេញ​ហើយ យើងម៉េចនឹងអាចបូមទឹកដាក់អាងទៀត? ទាល់តែយើង​ហ៊ាន​ទទួល​ស្គាល់​ថា​យើង​​អត់​ចេះ​អ្វីមួយ ទើបយើងអាចដឹងថាយើងត្រូវរៀនអ្វី។
   
   
2. ត្រូវតែហ៊ានធ្វើខុស -- កំហុសមិនមែនជាផ្លូវដែលយើងគួរជៀសទេ គឺជាផ្លូវដែលយើងត្រូវដើរ។ សិស្ស​ភាគ​ច្រើន​ខ្លាចធ្វើខុសនៅពេលដែលពួកគាត់ប្រឈរមុខនឹងលំហាត់ណាមួយ។ ប៉ុន្តែ​បើ​យើង​មិន​ធ្វើ​ខុស តើយើងម៉េចនឹងដឹងថាយើងធ្វើត្រូវ។ កំហុស​របស់​យើង​គឺជាគ្រូដ៏ល្អ​បំផុត​ដែល​អាច​បង្រៀន​យើង​​ថា តើអ្វីដែលយើងគួរឬមិនគួរធ្វើ។
   
   
3. ត្រូវមានគ្រូដែលខ្វាយខ្វល់ពីយើង -- គ្រូវបង្រៀនគឺជាបុគ្គល​សំខាន់ម្នាក់ដែលអាច​ជួយជ្រោមជ្រែង​និង​បង្រៀន​យើង​ឲ្យចេះ។ ប៉ុន្តែសំខាន់ជាងនេះទៅទៀត យើងត្រូវការគ្រូដែលខ្វល់ខ្វាយពីយើង ពីព្រោះ​ការ​រៀន​សូត្រវា​តភ្ជាប់អារម្មណ៍ សរីរាង្គកាយ និងខួរក្បាល។ គ្រូល្អមិនមែន​គ្រាន់តែ​ជាគ្រូដែលមាន​ចំណេះដឹងលើសលប់នោះទេ តែជាគ្រូដែលខ្វល់ខ្វាយពីសិស្ស។
   
   
4. អនុវត្ត អនុវត្ត និង អនុវត្ត -- ​គ្មានកីឡាករណាពូកែពីកំណើតទេ! គ្មានអ្នកលេង​ឧបករណ៍​តន្រ្តីណា​អាចចេះ​លេង​ដោយគ្មានការហ្វិកហាត់នោះទេ។ ដូចគ្នាដែរ គណិតវិទ្យា​តម្រូវឲ្យ​យើងអនុវត្តអ្វី​ដែល​យើងបានរៀនជាមួយគ្រូដោយខ្លួនឯង។ សិស្សខ្លះគិតថា មករៀនកត់​យកពីក្ពារ​ខៀនទៅគឺចេះ​ហើយ
   
   
5. ត្រូវតែហ៊ានរកជំនួយ -- អ្វីដែលសិស្សខ្លះយល់ច្រឡំជាងគេនោះគឺ ពួកគេគិតថាបើសិនជជាយើងចេះ យើងមិនត្រូវការជំនួយទេ! តាមពិតទៅ យើងកាន់តែចេះ យើងកាន់តែសួរ! ដូច្នេះហើយ កុំខ្លាច នឹង សួរ កុំខ្លាចនឹងរកជំនួយពីគ្រូ ពីអ៊ីនធឺណិត ពីសៀវភៅនិងឯកសារផ្សេងៗទៀត។ ទោះ​បីជាដំរីក៏​នៅ​មាន​ភ្លាត់។

តាមពិតទៅ គ្មានរូបមន្តឬវិធីទិព្វណាមួយដែលអាចធ្វើឲ្យមនុស្សគ្រប់ៗគ្នាចេះគណិតវិទ្យាឲ្យដូចគ្នានោះទេ។ មនុស្សម្នាក់ៗមានសេចក្តីត្រូវការខុសគ្នា ហើយក៏មានវិធីរៀនខុសៗគ្នាដែរ។ ដូច្នេះយើងត្រូវតែស្វែងរកអ្វីមួយ​ដែលអាចធ្វើឲ្យយើងសិក្សាចេះ។ នៅពេលដែលយើងរកគន្លិះនោះឃើញ យើងអាចសិក្សាអ្វីក៏បានដែរ!

---